د ښوونې او روزنې پوهنځي د بیولوژي له څانګې څخه د فارغو محصلانو له ډلې دوه تنو خپلې څېړنیزې پایلې د چاپېریال ساتنې ریاست په تالار کې وړاندې وړاندې کړې؛

شنبه: د ۱۴۰۴ کال قوس/لیندۍ ۸مه او د ۱۴۴۷ جمادی الثانی ۸مه نېټه.
 لوګر پوهنتون د ښوونې او روزنې پوهنځي له بیولوژي څانګې څخه د فارغو محصلانو له ډلې دوه تنو خپلې څېړنیزې پایلې د لوګر ولایت د چاپېریال ساتنې ریاست د غونډو په تالار کې د یو علمي کنفرانس په ترڅ کې د بېلابېلو محلي ادارو د مسؤلینو په حضور کې وړاندې کړې.
په یاد علمي کنفرانس کې د ترافیکو مدیریت، پوهنې، ښاروالۍ، د اوبو او انرژۍ ریاستونو استازو او همدار راز د چاپېریال ساتنې ریاست رئیس او مسلکي مدیرانو ګډون درلود.
د کنفرانس په ترڅ کې د فارغو محصلانو لخوا دوه مهمې څېړنې وړاندې شوې. د لومړي فارغ محصل څېړنه د (پل علم ښار پر اوسېدونکو د غږیزو ککړتیاوو اغېز) تر سرلیک لاندې وه، چې پکې د ښار په بېلابېلو سیمو کې د غږیزو ککړتیاوو کچه او د خلکو پر روغتیا او ورځني ژوند یې اغېزې څېړل شوې وې. دویم فارغ محصل خپله څېړنه د (اقلیمي بدلونونو لاملونه او اغېزې) تر سرلیک لاندې وه، چې په کې د اقلیم پر بدلون اغېزمن عوامل، سیمه‌ییز بدلونونه او د خلکو پر ژوند چاپېریالي اغېزې تشریح شوې وې.
یاد علمي کنفرانس کې د لوګر پوهنتون د څېړنو او علمي مجلې آمر پوهنوال دکتور وحیدالله عبدالرحیمزي  د علمي څېړنو ارزښت بیان کړ او په دې برخه کې یې د محلي ادارو همکاري د باور وړ او اغېزمنو څېړنو لپاره مهمه وبلله. هغه د چاپېریال ساتنې ریاست له مشرتابه مننه وکړه، چې د بیولوژي څانګې فارغو محصلانو ته یې د څېړنیزو پایلو د شریکولو لپاره لازمه زمینه برابره کړه.
تر دې وروسته ګډون کوونکو د دواړو څېړنو په اړه خپل نظرونه، وړاندیزونه او علمي مشورې وړاندې کړې. د محلي ادارو استازو د فارغینو څېړنې ګټورې وبللې او څرګنده یې کړه، چې یادې څېړنیزې موندنې به د ښار د چاپېریال ساتنې، د غږیزې ککړتیا د کمولو، د ښاري مدیریت او د اقلیمي بدلونونو د ښه درک او مدیریت په برخه کې عملي ګټې ولري.
د غونډې د پای شیبو کې د څېړنو او علمي مجلې آمر یو ځل بیا د ټولو ګډون کوونکو له حضور او همکاریو څخه مننه وکړه او ټینګار یې وکړ چې د څېړنو د کیفیت د لوړوالي لپاره د محلي ادارو مرسته او همغږي اړینه ده. نوموړي زیاته کړه، چې لوګر پوهنتون د علمي څېړنو د دودولو لپاره له ټولو ریاستونو سره د ګډ کار اراده لري.
د نشراتو، اړیکو او عامه پوهاوي عمومي مدیریت.