لوګر پوهنتون ګڼ شمېر محصلانو ته اصلاحي، فکري او روزنیز مجلس ترسره شو؛
چهار شنبه: د ۱۴۰۴ کال ميزان/ تلې ۳۰مه او د ۱۴۴۷ ربيع الثاني ۲۹مه نېټه.
لوګر پوهنتون ګڼ شمېر محصلانو ته د لوګر ولايت د بېلابېلو ادارو د مسؤلينو لخوا اصلاحي، فکري او روزنیز مجلس ترسره شو.
د مجلس پيل د لوګر پوهنتون د رئيس مفتي سيدضياءالاحمد صارم په ښه راغلاست او پیل وينا سره وشو. ورپسې ديني عالم مولوي محمد يوسف رحماني د اسلامي نظام پر اهمیت او ارزښت خبرې وکړې. نوموړي اسلامي نظام د عدالت، ورورګلوۍ او هر اړخيزې سلامتيا سمبول ياد کړ او زياته يې کړه، چې د اوسني حاکم اسلامي نظام له برکته مو د هيواد ټول وګړي د راحت او خوښۍ احساس کوي.
تر دې وروسته ديني عالم مفتي عبدالصبور حقاني په اسلامي نظام کې د ځوان پر اهميت هر اړخيزې خبرې وکړې. نوموړي پر محصلانو او ځوانانو ټینګار وکړ، چې د اسلامي نظام پر وړاندې خپل مسؤليت او مکلفيت په سمه توګه ترسره کړيد د وخت ارزښت وپېژني، خپلو اسلامي او ملي ارزښتونو ته درناوی ولري او د خپلې عقیدې، فکر او شخصیت په رغونه کې پوره زيار وباسي. ښاغلي حقاني همدا راز پر محصلانو غږ وکړ، چې د اسلامي نظام او هيواد د ښه خدمت لپاره خپلې موخې سالمې او پر اسلامي اصولو ولاړې وټاکي.
په پای کې د سمينار وروستي ويناوال او د لوګر ديني عالم مفتي ذبيح الله راشد محصلان خپل څلور کلن تحصیلي مسؤليت ته متوجه کړل او پر دوی يې د سالم فکر جوړولو ټينګار وکړ.
ياد اصلاحي او ديني مجلس د دعایې په لوستلو سره پای ته ورسېده.
د نشرانو، اړيکو او عامه پوهاوي عمومي مدیریت
