لوګر د لوړو زده کړو موسسې د ښوونې او روزنې پوهنځي د بیولوژي څانګې خپل مخکښ زده کړیالان وستایل!
شنبه: د ۱۴۰۳ کال میزان/تله ۷مه او د ۱۴۴۶ ربیع الاول ۲۵مه نېټه.
لوګر د لوړو زده کړو موسسې د ښوونې او روزنې پوهنځي بیولوژي څانګې خپل هغه زده کړیالان وستایل چې په خپلو ټولګیو کې یې په تېر پسرلني سمستر کې لوړې نمرې ګټلې او د یادې څانګې په نورو اړوندو برخو کې هم مخکښ وتلي وو.
په دې تړاو جوړو شوې غونډه کې د دغې موسسې د رهبري سربېره د یادې څانګې استادانو او زدکړیالانو ګډون درلود. د بیولوژي څانګې آمر پوهنمل محمد عالم عاطف د یادې څانګې پر شته تشکل، فارغو زده کړیالانو، د استادانو پر علمي رتبو، نوښتونو او همدا راز شته لابراتواري امکاناتو پر لا ښه والي او پرمختګ خبرې وکړې. ورته مهال د ښوونې او روزنې پوهنځي رییس پوهنیار ابراهیم نوري هم په خپلو خبرو کې یاد زده کړیالان وستایل د دوی د لوړو زده کړو د ترلاسه کولو دا لړۍ یې د ژوند لوی او ښه مجال وباله او زده کړیالانو ته ښه خدمت کولو په اړوند اړینې سپارښتنې وکړې. تر دې وروسته د دغې موسسې د څېړنو او علمي مجلې آمر او د بیولوژي څانګې استاد پوهندوی دکتور وحید الله عبدالرحیم زي زده کړیالانو ته د بیولوژي څانګې کاري ساحې په ګوته کړې او د بیولوژي علم د ارزښت او موخو په اړه یې ګټور معلومات وړاندې کړل. له دې سره د یادې څانګې فارغ زده کړیال او د کابل پوهنتون استاد نوماند پوهنیار غیرت الله احساس په خپلو خبرو کې له خپلو استادانو د مننې تر څنګ عصري علوم د علمي پرمختګ لامل یاد کړل. نوموړي همدا راز د دغه تحصیلي مرکز ټول خدمتونه وستایل او خبره یې، چې د آزادې سیالۍ له لارې یې د کابل پوهنتون د ساینس پوهنځي استادي ته خپلې څانګې د ټولو استادانو د ښو هڅو او همکاریو پر مټ لاره پیدا کړې.
د یادولو ده، چې د غونډې په پای کې د یادې څانګې لخوا دوتنه افتخاري استادانو او د څلورګونو ټولګیو مخکښو زده کړیالانو ته ترتیب شوي ستاینلیکونو او ډالۍ هم ورکړل شوې.
د نشراتو، اړیکو او عامه پوهاوي لوی مدیریت.
