لوګر د لوړو زده کړو موسسې د جیولوجي او کانونو پوهنځي زده کړیالانو د دغه ولایت محمدآغې ولسوالۍ ته علمي سفر ترسره کړ!
سه شنبه: د ۱۴۰۳ کال سنبله/وږي ۲۷مه او د ۱۴۴۶ ربیع الاول ۱۴مه نېټه.
لوګر د لوړو زده کړو موسسې د جیولوجي او کانونو پوهنځي د څلورم ټولګیو زده کړیالانو د عملي زده کړو په برخه کې د دغه ولایت د محمدآغۍ ولسوالۍ د سیاه¬کوه سیمې ته علمي سفر ترسره کړ.
دغه علمي سفر تېره ورځ ترسره شو، چې د دغې موسسې د جیولوجي او کانونو پوهنځي څلورتنو لارښودو استادانو یې ملتیا کوله. په یاد سفر کې زده کړیالانو د سیاه کوه سیمې اړوند د (کرومایټو قېمتي ډبرو) له کان څخه لیدنه وکړه. ورته مهال یادو زده کړیالانو ته د لارښودو استادانو او همدا راز د یاد کان د قراردادي شرکت د مسلکي انجنیرانو لخوا د کان او اړوندو مسلکي ماشینونو او وسایلو د پېژندنې په اړوند لازمې لارښوونې او معلومات وړاندې شول.
دغه علمي سفر په اسې حال کې ترسره کیږي، چې تر دې وړاندې هم د یاد پوهنځي د څلورم ټولګیو زده کړیالان د عملي او مسلکي زده کړو په موخه د کابل پولي¬تخنیک پوهنتون ته په ۱۵ ورځني علمي سفر تللي وو.
د نشراتو، اړیکو او عامه پوهاوي لوی مدیریت.
