د لوړو زده کړو سرپرست وزیر لوګر د لوړو زده کړو موسسه کې ۸ بېلابېلې پروژې پرانیستې!
پنجشنبه: د ۱۴۰۳ کال عقرب/لړم ۳مه او د ۱۴۴۶ ربیع الثانی ۲۱مه نېټه.
د لوړو زده کړو سرپرست وزیر شیخ مولوي نداءمحمد ندیم تېره ورځ لوګر ولایت ته د رسمي سفر په ترڅ کې لوګر د لوړو زده کړو موسسې څخه د لیدنې پرمهال په دغه موسسه کې ۸ لویې او وړې پروژې پرانیسې!
په یادو پروژو کې د دغې موسسې د احاطوي دیوال پاتې برخه جوړېدل، د عمومي دروازې د ظاهري او پاتې برخو رغونه، څلور حلقې ژورې د اوبو څاه ګانې، یو باب معیاري کانتین، یو باب سایبان، له عمومي برېښنا سره د دغې موسسې وصلېدل، نوري فایبر او همدا راز شبکه سازي پروژې شاملې دي، چې د پولو ارزښت شاوخوا (۶۶میلیونه) افغانیو ته رسیږي. د یادو پروژو د پرانیستې پرمهال د لوړو زده کړو سرپرست وزیر ښاغلي شیخ مولوي نداءمحمد ندیم خوښي وښوده او د هیواد د تحصیلي مرکزونو هر اړخیزه آبادي او پرمختګ یې خپل او د نظام لومړیتوبونه یاد کړل. ورته مهال لوګر د لوړو زده کړو موسسې رهبري هم د ښاغلي وزیر راتګ دغې موسسې ته خورا ګټور یاد کړ او د یادو پروژو د منظوري او بشپړېدو په پار یې ترې مننه وکړه. د دې تر څنګ د لوړو زده کړو سرپرست وزیر د دغې موسسې په علمی شورا کې هم برخه واخسته او د دغې موسسې د چارو تر ښو ارزونو وروسته یې ځینې لازمې سپارښتنې هم د موسسې رهبري اړ استادانو ته وکړې. ښاغلي وزیر همدا راز د دغې موسسې د زده کړیالانو له استازیو سره د لیدنې پرمهال د دوی ستونزې او وړاندیزونه واورېدل او د هواري او همکاري په برخه کې یې پوره ډاډ ورکړ.
باید وویل شي، چې د لوړو زده کړو سرپرست وزیر د دغې موسسې له رهبري سره د ګډې ناستې پرمهال یو شمېر نور اړین وړاندیزونه هم منظور او د لازمو همکاریو ډاډ وړاندې کړ.
د نشراتو، اړیکو او عامه پوهاوي لوی مدیریت!
