لوګر پوهنتون د غونډو عمومي تالار د (مولانا یعقوب څرخي رحمه الله تالار) په نوم ونومول شو؛
دوشنبه: د ۱۴۰۴ کال عقرب/ لړم ۵مه او د ۱۴۴۷ جمادی الاول ۵مه نېټه.
لوګر پوهنتون د غونډو عمومي تالار د دغه پوهنتون د دعوت او ارشاد آمريت پر نوښت او د پوهنتون د علمي شورا د پرېکړې پر اساس د (مولانا یعقوب څرخي رحمه الله تالار) په نوم ونومول شو.
مولانا یعقوب څرخي رحمه الله، چې د ژوند پيلامه يې د لوګر ولايت د څرخ ولسوالۍ پورې تړلې د لوګر ولايت د اطلاعاتو او کلتور رياست د معلوماتو پر اساس د نوموړي رحمه الله د ژوند نېټه تېر نهم قرن ته منسوبيږي.
مولانا یعقوب څرخي رحمه الله، چې د اسلامي نړۍ پر سطحه مشهور ديني عالم، متصوف او مفسر تېر شوی د اسلام د خدمت په موخه يې په تفسير او نورو برخو کې چاپ او ناچاپ آثار پرېښي دي.
د نوموړي رحمه الله شخصيت او تېر ته په کتو د دغه پوهنتون د دعوت او ارشاد آمريت هم لازمه وبلل؛ تر څو د دغه پوهنتون د غونډو د عمومي تالار لپاره داسې نوم غوره کړي، چې په ليدو او اورېدو يې مقابل لوری له ځان سره اصلاحي، فکري او عقيدوي درس او انګېزه خپله کړي.
بايد وويل شي، چې د لوګر پوهنتون د مولانا یعقوب څرخي رحمه الله تالار د سلګونو کسانو د ناستې لپاره په معياري ډول جوړ شوی، چې پوهنتون اړوندو علمي، اصلاحي او روزنيزو غونډو، مجلسونو او ناستو په موخه ورڅخه ګټه اخستل کيږي.
د نشراتو، اړيکو او عامه پوهاوي عمومي مدیریت.
