لوګر پوهنتون د کرنې پوهنځي او د لوګر ولایت د ښاروالۍ ریاست تر منځ د ګډو همکاریو هوکړه لیک لاسلیک شو!
شنبه: د ۱۴۰۴ کال تلې/ ميزان ۱۲مه او د ۱۴۴۷ ربيع الثاني ۱۱مه نېټه.
لوګر پوهنتون د کرنې پوهنځي او د لوګر ولایت د ښاروالۍ ریاست تر منځ د ګډو همکاریو هوګړه د دغه پوهنتو د رئیس مفتي سید ضیاءالاحمد صارم او د لوګر مرکز پل علم ښاروال ښاغلي مولوي محمد شاکر ثاقب لخوا لاسلیک شو.
دغه هوکړه لیک، چې د لوګر پوهنتون د کرنې پوهنځي په نوښت ترتیب شوی دی، له مخې به یې د علمي څېړنو په برخه کې د ښاري کرنې، شنو ساحو او چاپېریال ساتنې اړوند څېړنې له ښاروالۍ ریاست سره شریکیږي؛ تر څو د یو زرغون او ښېرازه ښار لپاره ترې ګټه واخستل شي. د دې تر څنګ به د کرنې پوهنځي استادان او زده کړیالان د ښاروالۍ ریاست اړوند د عامه پوهاوي په تبلیغاتي برنامو، ملي ورځو د لمانځلو، د ښاري ودې په برخه کې د نویو نوښتونو د رامنځته کولو او نورو ګډو څېړنیزو برخو کې پوره همکاري او برخه اخلي.
له دې سره سره په یاد هوکړه لیک کې دا هم په ډاکه شوي، چې د ښاروالۍ ریاست به د لوګر پوهنتون زده کړیالانو ته د عملي زده کړو لپاره د ښاري چارو په اړوندو برخو کې د کار کولو ترتیب برابروي او د دې تر څنګ به د کارزده کړې په برخو کې د یادو زده کړیالانو لاس نیوی کوي او همدا راز به د زده کړیالانو لپاره د میداني څېړنو په برخه کې هم زمینه برابروي؛ تر څو زده کړیالان د ښاروالۍ اړوند موضوعاتو باندې علمي څېړنې ترسره کړي.
باید وویل شي، چې یاد هوکړه لیک به د راتلونکو پنځو (۵) کلونو لپاره د پلي کېدو او ګټې اخستنې جوګه وي، چې له مخې به یې دواړه ادارې په اړوندو برخو کې د مثبتو پایلو او لاسته راوړنو درلودونکې وي.
د نشراتو، اړیکو او عامه پوهاوي عمومي مدیریت.
