لوګر د لوړو زده کړو موسسې د څلورګونو پوهنځیو زده کړیالانو ته د (طریقه¬های مؤثر یادگیری) تر سرلیک لاندې روزنیز سمینارونه وړاندې شول!

سه شنبه: د ۱۴۰۳ کال میزان/تلې ۱۰مه او د ۱۴۴۶ ربیع الاول ۲۸مه نېټه.
لوګر د لوړو زده کړو موسسې د څلورګونو پوهنځیو زده کړیالانو ته د (طریقه¬های مؤثر یادگیری) تر سرلیک لاندې بېلابېل روزنیز سمینارونه په نوبتي ډول وړاندې شول.
یاد روزنیز سمینارونه د دغې موسسې د مسلکي پراختیا آمر پوهنیار محمد شریف سلطاني لخوا ترتیب او وړاندې شول. لوګر د لوړو زده کړو موسسې د علمي او محصلانو چارو مرستیال پوهندوی دکتور شفیق الله شفقت د سمینارونو د وړاندې کولو پر مهال خپلو خبرو کې داسې سمینارونه خورا ګټور یاد کړل. نوموړي زده کړیالانو ته وویل، چې په خپلو کې د ښې مطالعې دود ډېر کړي او همدا راز د مؤثرې مطالعې او زده کړې له مېتودونو او لارو چارو ګټه واخلي. ښاغلي شفقت همدا راز د انسان د غوره شخصیت جوړونې، ټولنې جوړونې او ځان جوړونې ستر لاملونه مؤثره او ښه مطالعه او زده کړه یاده کړه.
هېره دې نه وي، چې لوګر د لوړو زده کړو موسسې زده کړیالانو ته وخت پر وخت دې ته ورته اړین او ارزښتمن فکري، مسلکي او ټولنیز-روزنیز سمینارونه او درسونه وړاندې کیږي.
د نشراتو، اړیکو او عامه پوهاوي لوی مدیریت.