د ښوونې او روزنې پوهنځي د ۷ بېلابېلو څانګو د لومړیو ټولګیو زده کړیالانو ته د پوهنتون د پېژندګلوۍ او ښه راغلاست غونډه ترسره شوه!
سه شنبه: د ۱۴۰۴ کال سنبلې/ وږي ۴مه او د ۱۴۴۷ ربیع الاول ۲مه نېټه.
لوګر پوهنتون د ښوونې او روزنې پوهنځي د ۷ بېلابېلو څانګو د لومړیو ټولګیو نویو بریالي شویو زده کړیالانو ته د پوهنتون د پېژندګلوۍ او ښه راغلاست غونډه د یاد پوهنځي د رهبري لخوا ترسره شوه.
د یادې غونډې په پیل کې د ښاغلي قاري عزت الله لخوا د قرآنکریم د څو مبارکو آیتونو تر تلاوت وروسته د ښوونې او روزنې پوهنځي رئیس پوهنمل ابراهیم نوري نویو زده ګړیالانو ته د مبارکي او ښه راغلاست ترڅنګ پوهنتون د نوي تحصیلي ژوند کور او سرچینه یاد کړ او ټول زده کړیالان یې مکلف وښودل؛ ترڅو خپل راتلونکی او خپله شخصیت جوړونه له همدې ځایه پیل او د څلور کلن تحصیلي مزل په پای کې د ټولنې د غوره او لوستي ځوان په توګه د ښه خدمت جوګه وګرځي.
ورپسې په ترتیب سره د پوهنتون او پوهنځي پېژندنې او له تحصیلي چاپېریال سره د بلدتیا په اړوند معلومات د نوماند پوهنیار نورجمال مبارکزي، د لوړو زده کړو وزارت په اړوندو اکاډمیکو مرکزونو کې د نظم او ډسپلین د لایحې تشریح د نوماند پوهنیار شیرمحمد حریفال او همدا راز د کریډیټ سیستم د لایحې تشریح د نوماند پوهنیار محمد فلاح سلطاني لخوا وشول.
ورته مهال زده کړیالانو هم یاده غونډه اړینه او ارزښتمنه وبلل او ژمنه یې وښوده، چې د دغه پوهنتون ټولو اصولو ته په پوره پام او درناوي سره به خپل تحصیلي بهیر پرمخ بیایي.
د نشراتو، اړیکو او عامه پوهاوي عمومي مدیریت.
