لوګر د لوړو زده کړو مؤسسې د استادانو مسلکي پرمختیا مرکز (PDC) گټې اخېستنې ته وسپارل شو
یاد مرکز د لوړو زده کړو وزارت پراختیايي بودېجې څخه د ۳۲۸۱۹۱۶ درې میلیونه، دوه سوه یو اتیا زره، نه سوه او شپاړس افغانیو په مالي لګښت د کوبل لوجیستکي شرکت لخوا بشپړ او نن د پنجشنبې ورځ د ۱۳۹۹ کال لېندۍ میاشتې په ۶مه نېټه، د یو لړ مراسمو په ترڅ کې، د دغه علمي بنسټ رئیس ښاغلي پوهنمل عبدالناصر ستانکزي، معاونینو، استادانو، اداري کارکوونکو، قومي مشرانو او ګڼ شمیر محصلانو په حضور کې، ګټې اخېستنې ته وسپارل شو. ښاغلي پوهنمل عبدالناصر ستانکزي د استادانو او اداري کارکوونکو د ارتقا او په ټوله کې د محصلانو درسي ښه کیفیت لپاره دغه مرکز یو ستر ګام او قدم و ګڼل او هېله يې څرګنده کړه چې ورڅخه مثبت او لازمه ګټه پورته شي. همدارنګه نورو وینوالو هم د دغه مرکز په اهمیت او په هغو وظایفو چې په دغه مرکز کې تر سره کیږي خبرې وکړې. په پای کې د یاد مراسم غونډه د پټۍ په پرې کولو او اختتامې دعایې په ویلو سره پای ته ورسیده.
