لوګر پوهنتون رهبري، استادانو او اداري کارکوونکو ته نوی ستراتیژیک تشریح شو؛

په پیل کې د دغه پوهنتون سرپرست رئیس پوهندوی مولوي میرویس ستانکزي تر ښه راغلاست وروسته د نوي ستراتیژیک پلان پر جوړېدو او د لوړو زده کړو وزارت لخوا یې پر تائید خوښي وښوده. ښاغلي ستانکزي وویل، چې د یاد ستراتیژیک پلان په پلي کېدو سره به لوګر پوهنتون له علمي او اداري اړخه د لویو پرمختګونو او لاسته راوړنو شاهد وي او په وینا یې، چې د دې هر څه لپاره به په پوره همغږي او اخلاص سره کار کوي. ښاغلي ستانکزي همدا راز زیاته کړه، چې له نېکه¬مرغه لوګر پوهنتون ورځ تر بلې د پرمختګ په حال کې دی او د دوی هڅه دا ده، چې په دغه تحصیلي مرکز کې په راتلونکي کې نورې نوې پوهنځۍ او تحصیلي څانګې هم رامنځته کړي.
ورپسې د دغه پوهنتون مالي او اداري مرستیال مولوي فضل الربي مصطفی په خپلو خبرو کې ډاډ وړاندې کړ، چې د یاد ستراتیژیک پلان په رڼا کې به د دغه تحصیلي مرکز د علمي برخې د لاپیاوړتیا په موخه په پوره اخلاص سره کوي او هڅه به کوي، چې پوهنتون د هراړخیز پرمختګ او هوساینې لپاره د پام وړ خدمتونه او اسانتیاوې رامنځته کړي.
تر دې وروسته د ښوونې او روزنې پوهنځي استاد پوهنیار عزیرمحمد کار لخوا یاد ستراتیژیک پلان د یو ترتیب شوي سمینار په بڼه ټولو ګډونوالو ته تشریح شو.
باید وویل شي، چې لوګر پوهنتون لپاره یاد ستراتیژیک پلان له روان ۱۴۰۴ کال څخه پیل او تر راتلونکي ۱۴۰۸ ل کال پورې د پلي کېدلو په موخه ترتیب شوی دی.
د نشراتو، اړیکو او عامه پوهاوي عمومی مدیریت.