د کرنې پوهنځي محصلانو سیلو دولتي شرکت ته علمي سير ترسره کړ؛
سه شنبه: د ۱۴۰۴ کال عقرب/ لړم ۲۷مه او د ۱۴۴۷ جمادی الاول ۲۷مه نېټه.
لوګر پوهنتون د کرنې پوهنځي اګرانومي څانګې د څلورم ټولګي محصلانو د مسلکي زدهکړو د پیاوړتیا په موخه د کابل ولايت سيلو دولتي شرکت ته علمي سير ترسره کړ.
په ياد علمي سير کې محصلان د استاد پوهنیار شفیق الله بختیار او پوهنیار عبدالله ځلاند په ملتیا سیلو دولتي شرکت ته ولاړل او هلته یې د غنمو د ذخیره کولو او پروسس عملي بهير له نږدې وليده.
ورته مهال د سیلو دولتي شرکت مسؤلینو محصلانو ته د غنمو د قبلولو، پاکولو، وچولو، ذخیره کولو او ساتنې پوره بهیر په تفصیل سره تشریح کړ او د دې تر څنګ محصلانو د سیلو دولتي شرکت د پرمختللو وسايلو عملي کارونه هم له نږدې وليدله.
د دې تر څنګ د سیلو اړوند لابراتوار کې محصلانو ته د غنمو او نورو غله جاتو د رطوبت د اندازه کولو، د پروټین د فیصدي معلومولو، د خالصوالي د درجې ټاکلو او نورو مهمو ازموینو لپاره د بېلابېلو ماشینریانو د کارونې عملي زده کړه ورکړل شوه، چې محصلانو د هرې برخې پر عملي کار، موخو او اهمیت هر اړخيز معلومات ترلاسه کړل.
بايد وويل شي، چې لوګر پوهنتون محصلانو ته د علمي سيرونو ترتيب له لوړو زده کړو وزارت سره په همغږي د دغه پوهنتون د علمي او محصلانو چارو معاونيت اړوند د محصلانو د خدمتونو او هغږۍ عمومي او اړوندو پوهنځيو لخوا برابريږي.
د نشراتو، اړيکو او عامه پوهاوي عمومي مدیریت.
