لوګر د لوړو زده کړو موسسې د شرعیاتو او جیولوجي او کانونو پوهنځیو د نویو زده کړیالانو لپاره د ښه راغلاست غونډې ترسره شوې!

سه شنبه: د ۱۴۰۳ کال سنبله/وږي ۱۳مه او د ۱۴۴۶ صفر ۳۰مه نېټه.
لوګر د لوړو زده کړو موسسې د شرعیاتو او همدا راز د جیولوجي او کانونو پوهنځیو د نویو شامل شویو زده کړیالانو لپاره د ښه راغلاست او له پوهنتون سره د بلدتیا په موخه ځانګړې غونډې ترسره شوې.
په یادو غونډو کې د دغې موسسې د علمي او محصلانو چارو مرستیال پوهندوی دکتور شفیق الله شفقت او د یادو پوهنځیو رییسانو، استادانو او زده کړیالانو ګډون درلود. نویو زده کړیالانو ته د دغې موسسې علمي او محصلانو چارو مرستیال په خپلو خبرو کې ټینګار وکړ، چې د دوی هر چلند باید اکاډمیک او علمي وي او د استادانو د درناوي تر څنګ د دغه تحصیلي مرکز له شته مادي امکاناتو څخه سالمه ګټه پورته کړي. نوموړي همدا راز زیاته کړه، چې د تحصیلي دورې پیل او پای باید په ښه کیفیت او له لاسته راوړنو برخمن وي. ورته مهال د اړوندو پوهنځیو رییسانو هم زده کړیالانو ته د مبارکي او ښه راغلاست ترڅنګ، دوی په ښه درس ویلو او د وخت پر ارزښت پېژندلو مکلف وګرځول او یادو زده کړیالانو ته یې په دغه موسسه کې د ښه تدریس او نورو اړوندو خدمتونو د وړاندې کولو ډاډ ورکړ.
د غونډو په پای کې د دواړو پوهنځیو زده کړیالانو ته له پوهنتون سره د بلدتیا په موخه ښوونیز سمینارونه وړاندې شول.