لوګر پوهنتون ته د غځېدلي خامه سړک د پخېدو د چارو پرانیسته وشوه؛
شنبه: د ۱۴۰۴ کال عقرب/ لړم ۳مه او د ۱۴۴۷ جمادی الاول ۳مه نېټه.
لوګر پوهنتون ته له مرکز پل علم څخه د غځېدلي ۳ کيلو متره خامه سړک د پخېدو د چارو پرانیسته د يو شمېر لوړپوړو چارواکو او مسؤلينو لخوا وشوه.
په دې تړاو مراسمو کې د ټولګټو چارو وزارت تخنيکي معین مولوي عبدالکریم فاتح، د کورنيو چارو وزارت د مخدره توکو پر وړاندې د مبارزې معين شيخ مولوي محمد قاسم خالد، د لوګر ولايتي ادارو يو شمېر مسؤلينو او ديني علماء کرامو ګډون درلود.
د اړوندو مسؤلينو په وينا دغه خامه سړک، چې د ۳ کيلومتره په اوږدوالي او دوه لينونو سره په اساسي ډول پخېږي (۳۱۹ ميليونه) افغانۍ مالي لګښت ورباندې راځي، چې د ټولګټو چارو وزارت لخوا ورکول کېږي. د يادو مسؤلينو په خبره د دغه سړک د پخېدو چارې به د ۱۴ مياشتو په موده کې بشپړې شي.
ورته مهال د لوګر پوهنتون رهبري هم د ياد سړک پر پخېدو خوښي څرګندوي. د دغه پوهنتون رئيس مفتي سيدضياءالاحمد صارم وايي «خوښ یو د لومړي ځل لپاره د داسې نوښت او غوره پروژې د پلي کېدو شاهدان يو، چې له اړخه به يې د لوګر پوهنتون ټول کارکوونکي او په ځانګړي ډول محصلان پوهنتون ته د تګ راتګ پر وخت له ګڼ شمېر ستونزو او ننګونو څخه خلاس شي» د ښاغلي صارم په خبره د ياد سړک د پخېدو په موخه لوګر پوهنتون رهبري د ولايت مقام سره په همغږي بې سارې هڅې او اړوندو مسؤلينو وړاندیزونه کړي، چې بالآخره د عالیقدر امیرالمؤمنین حفظه الله تعالی په حکم سره د ياد سړک د پخېدو چارې د ټولګټو چارو وزارت لخوا پيل شوې.
بايد وويل شي، چې لوګر پوهنتون ته د غځېدلي خامه سړک د پخېدو چارې په داسې حال کې پيل شوې، چې دا مهال د لوړو زده کړو وزارت په مالي لګښت د دغه پوهنتون د داخلي سړکونو د جوړېدو او پخېدو چارې هم په چټکۍ سره روانې دي.
د نشراتو، اړيکو او عامه پوهاوي عمومي مدیریت.
