د لوګر ولایت د امربالمعروف ریاست مسؤلینو لوګر د لوړو زده کړو موسسې له ټولو مسؤلینو سره اصلاحي مجلس وکړ!

شنبه: د ۱۴۰۳ کال میزان/تلې ۲۸مه او د ۱۴۴۶ ربیع الثانی ۱۶مه نېټه.
 د لوګر ولایت د امربالمعروف ریاست مسؤلینو د یاد ریاست د رییس مولوي حجت الله صاحبزاده په مشري لوګر د لوړو زده کړو موسسې له ټولو مسؤلینو رهبري، استادانو، اداري او خدماتي کارکوونکو سره د ښې همغږۍ په موخه اصلاحي مجلس وکړ. 
د مجلس د پیل او ښه راغلاست وینا لوګر د لوړو زده کړو موسسې رییس مولوي ضیاءالاحمد صارم وکړه او یاد اصلاحي مجلس یې خورا ارزښتمن یاد کړ. نوموړي همدا راز د دغه تحصیلي مرکز د ټولو مسؤلینو د صورت او سیرت د سمون په اړوند پوره ډاډ وړاندې کړ او د دې تر څنګ یې د ټولنې او ځوان نسل اصلاح او سمه روزنه هم د دغه تحصیلي مرکز لومړیتوبونه یاد کړل.
ورته مهال د لوګر د امربالمعروف ریاست مسؤلینو هم په خپلو اصلاحي او هر اړخیزو ویناوو کې د هیواد د ځوان نسل او ټولنې اصلاح، فکري رغونه او سالمه روزنه د داسې تحصیلي مرکزونو ګډ مسؤلیتونه یاد کړل. د دوی په خبره تر بل هر چا، د ځوان نسل او ټولنې د ښې اصلاح او سالمې روزنې ډېره تمه تحصیلي مرکزونو ته کیږي، چې باید په دې برخه کې اړوند مسؤلین د پام وړ کار وکړي.
باید ووایو، چې د لوګر ولایت د امربالمعروف ریاست مسؤلین هر وخت د دغې موسسې له ټولو مسؤلینو او زده کړیالانو سره اصلاحي غونډې او مجلسونه ترسره کوي.
 د نشراتو، اړیکو او عامه پوهاوي لوی مدیریت