لوګر د لوړو زده کړو موسسې د کرنې پوهنځي زده کړیالانو د جنرال مبین خان د مالدارۍ تولیدي فارم ته علمي سفر ترسره کړ!
دوشنبه: د ۱۴۰۳ کال عقرب/لړم ۲۸مه او د ۱۴۴۶ جمادی الاول ۱۶مه نېټه.
لوګر د لوړو زده کړو موسسې د کرنې پوهنځي د کرنیز اقتصاد څانګې زده کړیالانو په لوګر ولایت کې د جنرال مبین خان د مالدارۍ تولیدي فارم ته علمي سفر ترسره کړ او د یاد تولیدي فارم له بېلابېلو برخو یې لیدنې وکړې.
له یادو زده کړیالانو سره د دغې موسسې د کرنې پوهنځي درې تنو استادانو پوهندوی محمد سردار احمدي، پوهنیار احمد نور ستانکزي او نوماند پوهنیار اسرارالله تسل د لارښود استاد په توګه ملتیا کوله. زده کړیالانو د جنرال مبین خان د مالدارۍ تولیدي فارم کې د کبانو تولیدي فارم، د بزو د ډولونو، د غواګانو د کورنیو او بهرنیو نسلونو ډولونو، د غواګانو د خوړو سرچینې، د شیدو تولید، اندازه او داسې نورو برخو څخه لیدنې وکړې. له یاد علمي سفر څخه د کرنې پوهنځي زده کړیالان هم خورا خوښمن وو او په وینا یې، چې په دغه علمي سفر کې یې په مسلکي برخه کې ډېر څه په عملي او تجربوي توګه ولیدل. ورته مهال د یاد تولیداتي فارم څښتن جنرال مبین خان هم لوګر د لوړو زده کړو موسسې د کرنې پوهنځي د زده کړیالانو په علمي سفر ورتګ خوښي وښوده او ژمنه یې وکړه، چې د نوموړي د مالدارۍ په تولیداتي فارم کې هر وخت د زده کړیالانو عملي زده کړو او مسلکي لیدنو ته چمتو دي.
دغه علمي سفر په داسې حال کې ترسره کیږي، چې تر دې وړاندې هم د کرنې پوهنځي زده کړیالان د لوګر او کابل یو شمېر کرنیزو، مالداري او تولیداتي فارمونو ته د عملي زده او تجربو ترلاسه کولو په موخه په علمي سفرونو تللي وو.
د نشراتو، اړیکو او عامه پوهاوي لوی مدیریت.
