لوګر د لوړو زده کړو موسسې اداري کارکوونکو ته د تضمین کیفیت ۱۱ ګوني معیارونه د دوه ورځني سمینار په لړ کې تشریح شول!
چهارشنبه: د ۱۴۰۴ کال اسد/ زمري ۲۲مه او د ۱۴۴۷ صفرالمظفر ۱۹مه نېټه.
لوګر د لوړو زده کړو موسسې ټولو اداري کارکوونکو ته د تضمین کیفیت ۱۱ ګوني معیارونه، چې د لوړو زده کړو وزارت د تضمین کیفیت او اعتبار ورکونې ریاست لخوا تازه ترتیب او را استول شوي وو د دغې موسسې د تضمین کیفیت او اعتبار ورکونې آمر پوهنیار عبدالعزیز عابد لخوا د دوه ورځني سمینار په لړ کې تشریح شول.
د دغه سمینار په پیل کې لوګر د لوړو زده کړو موسسې رییس مفتي سید ضیاءالاحمد صارم په خپلو خبرو کې ټول اداري کارکوونکي د یادو معیارونو پر پوهېدو مکلف یاد کړل او ټینګار یې وکړ، چې په اړوندو برخو کې دې د یادو معیارونو په پام کې نیولو سره اړوند اداري کارونه په پوره روڼتيا سره سرته رسوي او هڅه به مو دا وي؛ تر څو له دې فرصت څخه په ګټې اخيستنې د دغې موسسې د تضمين کيفيت دوهم پړاو هم په ښه ډول ترلاسه کړو.
دغه سمينار په داسې حال کې وړاندې کېږي، چې د دغې موسسې ټولو استادانو ته هم ورته سمينار د دوه ورځو په ترڅ کې وړاندې شو.
د نشراتو، اړیکو او عامه پوهاوي عمومي مدیریت.
