لوګر د لوړو زده کړو موسسې استادانو ته د تضمین کیفیت ۱۱ ګوني معیارونه د دوه ورځني سمینار په لړ کې تشریح شول!
چهارشنبه: د ۱۴۰۴ کال اسد/ زمري ۱۵مه او د ۱۴۴۷ صفرالمظفر ۱۲مه نېټه.
لوګر د لوړو زده کړو موسسې استادانو ته د تضمین کیفیت ۱۱ ګوني معیارونه، چې د لوړو زده کړو وزارت د تضمین کیفیت او اعتبار ورکونې ریاست لخوا تازه ترتیب او را استول شوي وو د دغې موسسې د تضمین کیفیت او اعتبار ورکونې آمر پوهنیار عبدالعزیز عابد لخوا د دوه ورځني سمینار په لړ کې تشریح شول.
د دغه سمینار په پیل کې لوګر د لوړو زده کړو موسسې رییس مفتي سید ضیاءالاحمد صارم په خپلو خبرو کې ټول استادان د یادو معیارونو پر پوهېدو مکلف یاد کړل او ټینکار یې وکړ، چې په اړوندو برخو کې دې د یادو معیارونو په پام کې نیولو سره زده کړیالان په اسلامي او ملي فکر او عقیده سمبال وروزي.
ورته مهال د دغې موسسې د علمي او محصلانو چارو مرستیال پوهندوی مولوي میرویس ستانکزي هم په پای کې یاد سمینار خورا اړین او ارزښتمن یاد کړ او د دغه تحصیلي مرکز د استادانو د تدریس د ښو پایلو او مسلکي خدمت راز یې د تضمین کیفیت په ټولو معیارونو کې نغښتی یاد کړ.
د نشراتو، اړیکو او عامه پوهاوي عمومي مدیریت.
