د جیولوجي او کانونو پوهنځي لخوا د جیولوجیستانو نړیوالې ورځې په پار علمي سمینارونه وړاندې شول!
سه شنبه: د ۱۴۰۴ کال ثور/ غویي ۲مه او د ۱۴۴۶ شوال المکرم۲۴مه نېټه.
لوګر د لوړو زده کړو موسسې د جیولوجي او کانونو پوهنځي د استادانو لخوا د جیولوجیستانو نړیوالې ورځې په پار علمي سمینارونه د د دغې موسسې د رهبري، استادانو، د لوګر د ولایتي ادارو یوشمېر مسؤلینو، په لوګر کې د مس عینک کان د (MCC) او )تویار) شرکتونو کورنیو او چینایي مسؤلینو او همدا راز د جیولوجي او کانونو زده کړیالانو په ګډون سره وړاندې کړل.
په پیل کې لوګر د لوړو زده کړو د علمي او محصلانو چارو مرستیال پوهندوی دکتورشفیق الله شفقت د ګډونوالو ته د ښه راغلاست تر څنګ د جیولوجیستانو پر مسؤلیت، ارزښت او مقام ارزښتمنې خبرې وکړې. ښاغلي شفقت همدا راز د هیواد اقتصادي او تکنالوژیکي پرمختګ له طبیعي زېرمو او په ځانګړي ډول له کانونو څخه پر سالمې ګټې اخستنې او استخراج کې دی، چې باید د دې برخې مسلکي انجنیران خپل ملي او اسلامي مسؤلیت په سمه توګه ترسره کړي. ورپسې د لوګر ولایت د چاپېریال ساتنې ریاست استازي انجنیر محمد یعقوب امیني هم په خپلو خبرو کې په لوګر کې د مس عینک کان د (MCC) او )تویار) شرکتونو کورنیو او چینایي مسؤلینو ته د کانونو د پروسس او کیندولو پر وخت د چاپېریال سانتې اړوندو لازمې لارښوونې او سپارښتنې بیان کړې. تر دې وروسته د لوګر ولایت د اقتصاد ریاست استازي څارنوال امیرحمزه مسلم په خپلو خبرو کې ټینګار وکړ، چې د لوګر مس عینک کان څخه د کټې اخستنې او استخراج په پایله کې دې د لوګر آبادي او پراختیاي کارونو ترسره کولو ته پوره پاملرنه وشي. ورته مهال د جیولوجي او کانونو پوهنځي سرپرست رییس پوهنیار محمد خالد درمان په خپلو خبرو کې د جیولوجیستانو نړیوالې ورځې د ارزښت تر څنګ وویل، چې په تېر کې د هیواد د شته کاني زېرمو سالم او منظم استخراج ته هېڅ پاملرنه نه ده شوې او د دغې برخې پر زده کړیالانو یې غږ وکړ، چې له درسونو د فراغت وروسته دې یادې برخې ته په پوره اخلاص سره کار وکړي. ښاغلي درمان همدا راز زیاته کړه، چې له طبیعي زېرمو څخه د سالمې ګټې اخستنې په صورت کې به په هیواد کې د ښې تکنالوژي خاوندان یو. د دې تر څنګ د جیولوجي او کانونو پوهنځي استاد پوهنیار نورالرحمن رحماني او همدا راز د (تویار) شرکت استازي انجنیر احمدالله هم په خپلو وار سره ترتیب شوي علمی-څېړنیز سمینارونه وړاندې کړل.
په پای کې د جیولوجي او کانونو پوهنځي د څلورم ټولګي د زده کړیالانو لخوا ګډونوالو ته په مسلکي برخه کې په زړه پورې تر تیب شوې تمثیلي پارچه وړاندې شوه او یاده غونډ د دغې موسسې د رهبري لخوا په لوګر کې د مس عینک کان د (MCC) او )تویار) شرکتونو کورنیو او چینایي مسؤلینو ته د ترتیب شویو مننلیکونو په ورکولو سره پای ته ورسېده.
د نشراتو، اړیکو او عامه پوهاوي عمومي مدیریت.
