د لوړو زده کړو سرپرست وزیر لوګر ولایت ته په رسمي سفر کې لوګر د لوړو زده کړو موسسې څخه لیدنه وکړه!
چهارشنبه: د ۱۴۰۳ کال عقرب/لړم ۲مه او د ۱۴۴۶ ربیع الثانی ۲۰مه نېټه.
د لوړو زده کړو وزارت سرپرست وزیر شیـخ مولوي نداءمحمد ندیم او ورسره مل پلاوي لوګر ولایت ته د رسمي سفر په لړ کې لوګر د لوړو زده کړو موسسې څخه لیدنه وکړه.
په دې تړا جوړه شوې غونډه کې د افغانستان د لوړو زده کړو وزارت سرپرست وزیر سربېره د یاد وزارت د دعوت او ارشاد رییس شیخ مولوي شاکرالله وحدت، مالي او حسابي رییس عبدالباري خپلواک، د لوګر والي شیخ ضیاءالرحمن مدني، لوګر د لوړو زده کړو موسسې رهبري، د لوګر د ملکي او نظامي ادارو مسؤلینو، دیني عالمانو، د دغې موسسې استادانو، اداري کارکوونکو، سلګونو زده کړیالانو او د ښوونځیو ګلالیو زده کوونکو ګډون درلود.
غونډه د قرآنکریم د څو مبارکو آیتونو تر تلاوت ورسته د دغې موسسې د رییس مولوي ضیاءالاحمد صارم په پیل وینا او ښه راغلاست پیل شوي. نوموړي په خپلو خبرو کې د نظام مشرانو او مسؤلینو لخوا د اړوندو ادارو له چارو لیدنه د ستونزو اورېدنه او د غوښتنو منل د اسلام یو اصل یاد کړ. ښاغلي صارم همدار راز د لوړو زده کړو وزارت له رهبري څخه په مننې وویل : (( له نېکه مرغه یاد وزارت په خورا زیاتې لوروینې سره لوګر د لوړو زده کړو موسسې ته د نو یو درېیو پوهنځیو د منظورېدو ترڅنګ د یو شمېر نورو تحصیلي څانګو په رامنځته کولو، د اداري او کادري تشکیل ډېرښت او همدا راز د ځینو نورو وړاندیزو د منلو او منظورېدو په برخه کې د پام وړ همکاري کړې)) همدا راز د دغې موسسې رییس په خپلو خبرو کې د دغې موسسې درې کلنې لاسته راوړنې، پرمختګونه، نوښتونه او د دې تر څنګ د دغې موسسې شته ستونزې او غوښتنې د لوړو زده کړو له قدرمن وزیر سره شریکې کړې. د غونډې دویم ویناوال د لوړو زده کړو وزارت د دعوت او ارشاد رییس شیخ شارکرالله وحدت و. ښاغلي وحدت هم په خپلو خبرو کې د اسلامي نظام د شکرانې پر اداءکولو، ښه اطاعت، مسؤلیت پېژندنې او ټولنې اصلاح په اړوند ټینګار وکړ. دغونډې درېیمه وینا د لوړو زده کړو وزیر شیخ مولوي نداء محمد ندیم وکړه. قدرمن وزیر په خپلو خبرو کې د هیواد پر اوسني تحصیلي نظام خوښي وښوده. او د عصري او دیني دواړو علومو پر زده کړه کې یې د هیواد آبادي او پرمختګ په ګوته کړ. د ښاغلي وزیر په خبره د عصري علومو په زده کړې سره په هیواد کې روغتیایي، اقتصادي او نور تحصیلي پرمختګونه منځ ته راځي او هیواد به له خپلو شته مادي او طبیعي امکاناتو څخه د ښې هوساینې څښتن وي. ښاغلي وزیر همدا راز پر زده کړیالانو ټینګار وکړ، چې د تحصیلي دورې مسؤلیتونه ښه وپېژنې، د خپلې کورنې هیلې پوره کړي د خپلو استادانو د درناوي تر څنګ د مسلکي، عقیدي او فکري زده کړو په ترسره کولو سره د هیواد او خپلې ټولنې خدمت وکړي. ښاغلي وزیر ځوانان د نن ورځې زده کړیالان او د سباورځې امیران، وزیران، معینان، والیان، رییسان او نور لوړو رتبه مسؤلین یاد کړل او پر استادانو یې غږ وکړ، چې د خپلو زده کړیالانو علمي، مسلکي فکري او عقیدوي روزنې ته پوره پام وکړي. ورته مهال د لوګر والي شیخ ضیاءالرحمن مدني هم په خپله وینا کې د عصري او دیني علومو پر زده کړې او سالم فکر جوړونې ټینګار وکړ او پر زده کړیالانو یې غږ وکړ، چې د تېر جمهوري نظام له کړنو او ناخوالو دې سالمې تجربې واخلي. د دې تر څنګ د لوګر ولایت نوموتی دیني عالم شیخ مولوي پیرمحمد حقاني هم په خپلو خبرو کې د عصري علومو او زده کړو پر ملاتړ د دغې موسسې ځینې ستونزې او اړتیاوې د لوړو زده کړو له قدرمن وزیر سره شریکې کړې.
د غونډې په پای کې لوګر د لوړو زده کړو موسسې د رهبري لخوا د لوړو زده کړو وزیر ښاغلي شیخ مولوي نداءمحمد ندیم او د لوګر والي شیخ ضیاءالرحمن مدني ته د عزت او ویاړ دستارونه هم ورپه سر شول. او غونډه د دعا په لوستلو سره پای ته ورسېده.
د نشراتو، اړیکو او عامه پوهاوی لوی مدیریت.
