د بهرنيو چارو وزارت د حقوقي معاهداتو رييس لوګر د لوړو زده کړو موسسې ګڼ شمېر زده کړيالانو ته فکري-تربيتي سمینار وړاندې کړ!

چهارشنبه: د ۱۴۰۴ کال جوزا/ غبرګولي ۷مه او د ۱۴۴۶ ذوالقعده ۳۰مه نېټه.
د اشغال پرمهال د لوړو زده کړو د جنوب ختيځې حلقې مسؤل او د بهرنيو چارو وزارت د حقوقي معاهداتو اوسنی رييس قاضي عبدالله عبيد لوګر د لوړو زده کړو موسسې ګڼ شمېر زده کړيالانو ته فکري-تربيتي سمینار وړاندې کړ.
دغه فکري- تربيتي سمينار تېره شپه لوګر د لوړو زده کړو موسسې دننه د صلاح الدين ايوبي (رحمه الله) د ليليې په مسجد کې د دغې موسسې د دعوت او ارشاد آمريت په هڅو ترتیب شوی و، چې ګڼ شمېر زده کړيالانو په کې ګډون درلود.
په سمينار کې د دیني او عصري علومو د ارزښت او اړتيا سربېره په يو لړ اړینو فکري او تربيتي موضوعاتو هراړخيزې او ګټورې خبرې وشوې.
بايد وويل شي، چې لوګر د لوړو زده کړو موسسه کې د دغې موسسې د دعوت او ارشاد آمريت لخوا د ليليې مېشتو زده کړيالانو ته د قرآنکريم د ژباړې او تفسير تر څنګ د احاديثو درسونه هم د منظم مهالوېش له مخې روان دي.
د نشراتو، اړيکو او عامه پوهاوي عمومي مدیریت.