لوګر د لوړو زده کړو موسسې مخکښ زده کړيالان وستايل شول!
سه شنبه: د ۱۴۰۴ کال سرطان/ چنګاښ ۳مه او د ۱۴۴۶ ذوالحجة الحرام ۲۷مه نېټه.
لوګر د لوړو زده کړو موسسې مخکښ زده کړيالان د دغې موسسې د علمي او محصلانو چارو معاونیت اړوند د محصلانو د انسجام عمومي مدیریت په هڅو د يوې غوندې په ترڅ کې وستايل شول.
په غونډه کې د دغې موسسې رييس مفتي سيدضياءالاحمد صارم په خپلو خبرو کې مخکښو زده کړيالانو ته د مبارکۍ تر څنګ د دوی د هڅونې په موخه دوی له وخت څخه د سمې ګټې اخیستنې په لړ کې پر ښه درس ویلو او همدارنګه په مسلکي برخو کې د علمي څېړنو پر ترسره کولو مکلف یاد کړل.
ورته مهال د دغې موسسې د علمي او محصلانو چارو مرستیال پوهندوی مولوي ميرويس ستانکزي په خپلو خبرو کې د هيواد پرمختګ او غوره خدمت په لوستو او مسلکي ځوانانو پورې تړلی وباله او زياته يې کړه، چې د غفلت او اخلاص نه کولو په صورت کې به د هېواد خلکو او خدای تعالی په وړاندې مسؤل يو.
په دغه غونډه کې د دغې موسسې د څلورګونو پوهنځیو څخه ۱۲ تنه مخکښ زده کړيالان غوره شوي وو، چې د دغه تحصیلي مرکز په کچه لومړی مقام ښاغلي فضل الهادي د برات خان زوی د ښوونې او روزنې پوهنځي د کيميا څانګې د درېيم ټولګي زدکړه کړيال، دويم مقام ښاغلي صفي الله د محمد ولي جان زوی د ښوونې او روزنې پوهنځي د بيولوژي څانګې د څلورم ټولګي زده کړيال او همدا راز درېيم مقام ښاغلي مطیع الله د صاحب خان زوی د کرنې پوهنځي د څلورم ټولګي زدکړيال خپل کړی و.
یاده غونډه مخکښو زده کړيالانو ته د ترتیب شويو ستاينپاڼو تر وېش وروسته د دعايې په لوستلو سره پای ته ورسېده.
د نشراتو، اړيکو او عامه پوهاوي عمومي مدیریت.
