لوګر پوهنتون استادانو، اداري کارکوونکو او محصلانو ته د کلمات علمي او څېړنیزې ادارې لخوا فکري او اصلاحي سمینار وړاندې شو؛

دوشنبه: د ۱۴۰۴ کال عقرب/ لړم ۱۹مه او د ۱۴۴۷ جمادی الاول ۱۹مه نېټه.
لوګر پوهنتون استادانو، اداري کارکوونکو او محصلانو ته د دغه رهبري په همغږي د کلمات علمي او څېړنیزې ادارې لخوا فکري او اصلاحي سمینار د ځانګړو موضوعاتو په لرلو سره وړاندې شو.
د یاد فکري او اصلاحي سمینار پیل د قرآن کریم د څو مبارکو آیتونو تر تلاوت وروسته د لوګر پوهنتون رئیس مفتي سید ضیاءالاحمد صارم په پیل او ښه راغلاست وینا سره وشو. ښاغلي صارم کلمات اداره د ځوان نسل د فکري روزنې او اصلاحي برنامو په برخه خورا د ښه خدمت مرکز یاد کړ او د دې تر څنګ یې د یادې ادارې له مسؤلینو په دغه تحصیلي مرکز کې د لانورو روزنیزو او فکري برنامو او سمینارونو د وړاندې کولو هیله وښوده.
ورپسې د دیني عالم شیخ القرآن والحدیث ابوعزام صاحب لخوا د سمینار ګډونوالو ته د استعمار په اړه هر اړخیز بیان وشو. ښاغلي ابوعزام صاحب په ځوانانو او محصلانو غږ وکړ، چې له قوم پرستۍ او سمت پرستۍ څخه ځان وژغوري؛ ځکه دا هغه څه دي، چې د استعمار سرچینه جوړیږي او په تکرار سره یې ټولنه له خورا ناخوالو او بدبختیو سره مخ کیږي. نوموړي همدا راز پر محصلانو ټینګار وکړ، چې د اسلامي امت د یوالي او پیاوړتیا په موخه په پوره مېړانه، سالمي عقیدې او اسلامي فکر لاسونه سره یو کړي.
ورته مهال د سمینار بل ویناوال او دیني عالم مفتي عبدالصبور حقاني هم په خپلو خبرو کې د استعمار پر پېژندنه او تاریخي اړخ خبرې وکړي او د دې تر څنګ یې پر محصلانو ټینګار وکړ، چې د غربي او پرديو فکرونو او نظریو پر وړاندې تل مبارز پاتې شي او یادو تاثیراتو ته په خپله اسلامي ټولنه کې ځای ورنه کړي.
یاد علمي، فکري او اصلاح سمینار د دغه پوهنتون د مالي او اداري مرستیال مولوي فضل الربي مصطفی لخوا د دعایې په لوستلو سره پای وموند.
د نشراتو، اړیکو او عامه پوهاوي عمومي مدیریت.