لوګر پوهنتون کې د ولیبال یو باب معیاري لوبغالی ګټې اخیستنې ته وسپارل شو؛
چهارشنبه: د ۱۴۰۵ کال سنبلې/ وږي ۲۵مه او د ۱۴۴۸ ربیع الثانی ۳مه نېټه.
لوګر پوهنتون کې د (۱،۶) میلیونه افغانیو په ارزښت د ولیبال لوبې یو باب معیاري لوبغالی، دافغان ځوانانو خدماتي مؤسسې لخوا جوړ شوی و ګټې اخیستنې ته وسپارل شو.
په دې تړاو جوړو شویو مراسمو کې د لوګر مرستیال والي شیخ مولوي انعام الله صلاح الدین، د لوګر پوهنتون رهبري، د لوګر ولایت د طبیعي پېښو پر وړاندې د چمتووالي ریاست رهبري او مسؤلین، د ولایتي ادارو یو شمېر مسؤلین، د افغان ځوانانو خدماتي مؤسسې استازي، د لوګر پوهنتون یو شمېر استادان او محصلان ګډونوال وو.
په مراسمو کې د لوګر پوهنتون رئیس مفتي سید ضیاءالاحمد صارم ګډونوالو ته د ښه راغلاست تر څنګ د یاد لوبغالي پر جوړېدو خوښي وښوده او زیاته یې کړه، چې په دې سره به د لوګر پوهنتون د محصلانو د روغتیا ساتنې او سالمې تفریح لپاره مناسب چاپېریال رامنځته شي. ښاغلي صارم همدا راز په دې برخه کې د همکارو ولایتي ادارو او مرستندویه مؤسسې له استازیو مننه وکړه او زیاته یې کړه، چې یادې ادارې او مؤسسې باید له دې وروسته هم په اړونده برخو کې د دغه تحصیلي مرکز د آبادۍ او پرمختګ لپاره پوره همغږې او همکارې واوسي. نوموړي همدا راز د ورزش د ارزښت او ګټو د بیانولو تر څنګ پر محصلانو ټینګار وکړ، چې د لوبو کولو پر مهال باید بشپړ اسلامي اخلاق او اصول په پام کې ونیسي.
ورته مهال د لوګر مرستیال والي شیخ مولوي انعام الله صلاح الدین هم په خپلو خبرو کې د ورزش پر اهمیت او اړتیا خبرې وکړې. ښاغلي صلاح الدین ورزش د انساني ژوند اړتیا وبلل او زیاته یې کړه، چې د ټولنې ځوانان باید غښتلي د روغتیا ساتنې له اړخه سالم او همدا راز د ښه خدمت په موخه د پېاوړو ارادو څښتنان وي.
د دې تر څنګ د لوګر ولایت د طبیعي پېښو پر وړاندې د چمتووالي ریاست د پېښو پر وړاندې د چمتو والي آمر مولوي شفیع الله صافي هم په خپلو خبرو کې د یاد لوبغالي د جوړېدو په برخه کې د خوښې تر څنګ د اړونده همکاره ادارو له همغږۍ مننه وکړه.
د افغان ځوانانو خدماتي مؤسسې د مسؤلینو په خبره، چې دغه لوبغالی د (۱،۶) میلیونه افغانیو په ارزښت جوړ شوی، چې د ولیبال لوبې لپاره په کې لازم او معیاري امکانات په پام کې نیول وشي دي.
د نشراتو او عامه اړیکو عمومي مدیریت.
