د لوړو زده کړو وزارت محترم وزیر د لوګر پوهنتون محصلانو فراغتغونډه کې ګډون او وینا وکړه

د لوړو زده کړو وزارت وزیر محترم شیخ الحدیث مولوي نداء محمد ندیم صاحب، د لوګر پوهنتون محصلانو فراغتغونډه کې، په داسې حال کې چې د لوګر مرستيال والي، امنیې قومندان، د استخباراتو رییس، د ولایتي ادارې یو شمېر رئیسانو، دیني علماء کرامو، د لوګر پوهنتون رهبري پلاوي، استادانو، فارغو شویو محصلانو او د هغوی د کورنۍ غړو ګډون کړی و، مهمې او ارزښتناکې خبرې وکړې. 
په یاده فراغتغونډه کې د لوړو زده کړو وزارت محترم وزیر فارغ شوي محصلان د ماسټري او دوکتورا برنامو لوړو زده کړو ته وهڅول او ویې ویل، چې اوس الحمدالله په ملک کې دننه د لوړو زده کړو زمینه برابره شوې او په بېلا بېلو برخو کې د ماسټري او دوکتورا برنامې ایجاد شوي دي. 
د لوړو زده کړو وزارت محترم وزیر فارغو شویو محصلانو ته وویل چې نن ستاسو د څلورو کلونو زحمتونو د پایلې ورځ ده او تاسو د علم په واسطه کمال ته ورسېدئ او زیاته یې کړه: «که د فوق لېسانس لوړو زده کړو توان نه لرئ، نو په خپل مسلک کې کار وکړئ، خو په هېڅ وجه له افغانستان څخه د تېښتې لار ونه ټاکئ.»
همدا راز محترم شیخ صاحب د اسلامي نظام (اسلامي امارت) او جمهوریت پر توپیر خبرې وکړې او ویې ویل چې اسلامي امارت د ټولو افغانانو ګډ نظام دی، ټول یې د خدمت او ساتنې حق او مسؤلیت لري او د علم په واسطه ابادېدای او پرمختګ کولی شي. 
دغه راز محترم شیخ صاحب له فارغو شویو محصلان وغوښتل چې خپله عقیده وساتي، نېک اعمال ترسره کړي، د رسول الله صلی الله علیه وسلم اخلاق په ځان کې راولي او د دښمنانو د تبلیغاتو تر اغېزې لاندې رانشي. 
همدارنګه د لوګر مرستیال والي شيخ مولوي انعام الله صلاح الدين د علم او زده ‌کړو پر ارزښت خبرې وکړې او ویې ویل چې علم د ټولنې د پرمختګ، د مسلکي کادرونو روزنې او د ملک د ابادۍ لپاره اساسي ارزښت لري.
همدا راز د لوګر پوهنتون رئيس مفتي سيد ضياءالاحمد صارم وویل چې پوهنتون ژمن دی چې په پوره اخلاص او شته امکاناتو د ځوان نسل ښه روزنه وکړي.
د یادونې وړ ده چې په دغه فراغتغونډه کې د لوګر پوهنتون دریو شرعیاتو، کرنې او ښوونې او روزنې پوهنځيو بېلا بېلو څانګو څانګو ۱۴۴ تنه محصلان فارغ او ټولنې ته د خدمت په موخه وړاندې شول. 
هېره دې نه وي چې محترم شیخ صاحب او نورو مېلمنو د عالیقدر امیرالمؤمنین حفظه الله تعالی ورعاه د (۵) فرمانونو کتاب سيالۍ ګټونکو محصلانو ته لپټاپ کمپیوټرونه او نورې ډالۍ ورکړې. 
نېټه: چهارشنبه
۱۴۴۸هـ.ق، د جمادی الاول ۹مه
۱۴۰۵هـ.ش، د میزان ۲۹مه