لوګر پوهنتون کې د لومړي ځل لپاره د (نږدې ۶ سوه زره) افغانيو په ارزښت تجهيزاتو سمبال د علمي څېړنو مرکز فعال شو!

دوشنبه: د ۱۴۰۴ کال سنبله/ وږي ۲۵مه او د ۱۴۴۷ ربيع الاول ۲۳مه نېټه.
لوګر پوهنتون کې د لومړي ځل لپاره د (نږدې ۶ سوه زره) افغانيو په ارزښت تجهيزاتو سمبال د علمي څېړنو مرکز فعال او د دغه پوهنتون د رهبري لخوا پرانيستل شو.
د دغه څېړنيز مرکز د پرانيستې پر مهال د پوهنتون د رهبري سربېره د څلورګونو پوهنځيو رییسان، يو شمېر د څانګو او مستقل آمرين، يو شمېر استادان او اداري کارکوونکي وو.
په پيل کې ددغه پوهنتون مالي او اداري مرستيال مولوي فضل الربي مصطفی د ياد مرکز پر پرانيستې خوښي وښوده او زياته يې کړه، چې په دغه تحصیلي مرکز کې ټول پرمختګونه او لاسته راوړنې د اړوند اداري او کادري کارکوونکو هڅې، اخلاص او ښه کار کول دي، چې د دوی په وړاندیز او د لوړو زده کړو وزارت په همکاري د د (نږدې ۶ سوه زره) افغانيو په ارزښت دغه مرکز ته د تجهیزاتو په برخه کې دوه پایې د آمریت لوی میزونه، څلور پایې د مدیریت واړه مېزونه، دوه پایې د آمریت چوکۍ، څلور پایې د مدیریت چوکۍ، څلور سېټه مېز لرونکي دفتري کوچونه، د جلساتو لوی میز او اړوندې وړې چوکۍ، څلور پایې المارۍ، قیمتي پرشونه او یو شمېر برېښنایي وسایل اخستل شوي دي. نوموړي همدا راز وويل، چې له دې وروسته به هم په پوره اخلاص هڅه کوي، چې د دغه تحصیلي مرکز د هړ اخیز پرمختګ لپاره په پوره همغږي کار وکړي.
ورپسې د علمي او محصلانو چارو مرستیال پوهندوی مولوي میرویس ستانکزي په خپلو خبرو کې د دغه څېړنیز مرکز پر فعالېدو او پرانیستې د زړه له تله خوښي وښوده او د علمي څېړنو ارزښت ته په اشارې یې وویل، چې د نړۍ نني پرمختګونه او ټکنالوژیکې وړتیا ټولې د علمي څېړنو پر مټ ترسره شوي دي. نوموړي زیاته کړه، چې د ټولنې تمدن او علمي پرمختګ علمي څېړنو ته اړتیا لري، چې اړوند مسؤلین باید له داسې مرکزونو سالمه ګټه واخلي او د ټولنې او ځوان نسل د ښې روزنې په موخه نوې علمي څېړنې او برنامې تولید کړي.
ورته مهال د لوګر پوهنتون د څېړنو او علمي مجلې آمر پوهندوی دکتور وحیدالله عبدالرحیم زي د یاد مرکز پرانیسته یوه ستره لاسته راوړنه یاده کړه او زیاته یې کړه، چې په دغه تحصیلي مرکز کز تر دې وړاندې هم د څېړنو او علمي مجلې آمریت شتون درلود او په اړونده برخه کې یې د پام وړ چارې ترسره کړي دي؛ خو د دې مرکز له فعالېدو او پرانیستې سره سم به دوی خپلې هڅې او کړنې لا ګړندۍ ساتي او د شته امکاناتو څخه په کټې اخستنې په د علمي څېړنو په ترسره کولو او تولید کې د پام وړ ګامونه اوچتوي.
د نشراتو، اړیکو او عامه پوهاوي عمومي مدیریت.