لوګر د لوړو زده کړو موسسې د اداري فساد پر وړاندې د مبارزې کمېټې ناسته ترسره شوه!

سه شنبه: د ۱۴۰۳ کال اسد/زمري ۱۶مه او د ۱۴۴۶ صفر ۲مه نېټه.
لوګر د لوړو زده کړو موسسې د اداري فساد پر وړاندې د مبارزې کمېټې ناسته د دغې موسسې د رییس مولوي ضیاءالاحمد صارم په مشرۍ ترسره شوه.
په ناسته کې د دغې موسسې د علمي او محصلانو چارو مرستیال پوهندوی دکتور شفیق الله شفقت سربېره د څلورګونو پوهنځیو رییسانو او د دعوت او ارشاد آمر ګډون درلود. په پیل کې د دغې موسسې رییس په خپلو خبرو کې اداري فساد د یوې ادارې د له منځه وړلو لوی لامل یاد کړ. نوموړي وویل چې هر ډول خیانت په یوه اداره کې اداري فساد بلل کیږي. ښاغلي صارم همدا راز په دندو کې غفلت ته په اشارې وویل، چې د هر معاونیت او پوهنځي مشر لومړی پر ځان او بیا پر خپله ټوله کاري ډله مسؤل دی، چې له ورځنیو او رسمي چارو یې څارنه او ارزونه وکړي د نوموړي په خبره، هېڅ مسؤل باید خپلې کاري ډلې ته د اداري فساد او غفلت کولو وخت او جرآت ورنکړي، چې په دې صورت کې به ټول د یوې سالمې او ښې ادارې درلودونکي او شاهدان یو. ورپسې په ناسته کې پر ځینو نورو اړوندو موضوعاتو هم بحث او پرېکړې وشوې او یاده ناسته د ګډونوالو لخوا د وړاندیزونو او نظرونو سره پای ته ورسېده.
د نشراتو، اړیکو او عامه پوهاوي لوی مدیریت.