لوګر پوهنتون کې د علمي آثارو د تدقيق ځانګړې کمېټه جوړه او په فعاليت يې پيل وکړ

چهارشنبه: د ۱۴۰۴ کال قوس/ ليندۍ ۱۲مه او د ۱۴۴۷ جمادی الثاني ۱۲مه نېټه‌.
لوګر پوهنتون کې د لوړو زده کړو وزارت مقام د لارښوونې پر اساس د علمي آثارو د تدقیق ځانګړې کمېټه د دغه پوهنتون د رئيس مفتي سيدضياءالاحمد صارم په مشري جوړه او پر فعاليت يې پيل وکړ.
ياده ځانګړې کمېټه د علمي آثارو د معیارونو ساتنې او د اکاډمیکو آثارو د کیفیت لوړولو په موخه جوړه شوې.
دغه کمېټه به د لوګر پوهنتون د علمي فعالیتونو په ترڅ کې علمي مقالې، پروپوزلونه، مونوګرافونه او نور علمي آثار تر ژور تحلیل، ارزونې او کره کتنې لاندې نیسي؛ ترڅو د علمي اصولو، تګلارو او معیارونو پر بنسټ د تائید وړ وګرځي.
بايد وويل شي، په دغه کمېټه کې د لوګر پوهنتون د رئيس په مشري يو شمېر د بېلابېلو څانګو استادان ټاکل شوي دي.
د نشراتو، اړيکو او عامه پوهاوي عمومي مدیریت.