د کرنې پوهنځي د اګرانومي څانګې ۲۳ تنه محصلانو خپل څېړنیز پروپوزلونه تشريح او وړاندې کړل؛
چهارشنبه: د ۱۴۰۴ کال قوس/ ليندۍ ۱۲مه او د ۱۴۴۷ جمادی الثاني ۱۲مه نېټه.
لوګر پوهنتون د کرنې پوهنځي د اګرانومي څانګې د اووم سمستر ۲۳ تنه محصلانو خپل څېړنیز پروپوزلونه د پوهنتون د رهبري او ژوري هيئت په حضور کې تشريح او وړاندې کړل.
په پيل کې د اګرانومي څانګې آمر پوهنيار فضل حنان ساپي د ښه راغلاست تر څنګ د څېړنو پر ارزښت خبرې وکړې او همدا راز يې په دې برخه کې د پوهنتون له رهبري څخه د لا نورو د امکاناتو د برابرولو غوښتنه وکړه. ښاغلي ساپي په وروستيو کې محصلان وهڅول؛ تر څو د خپلو علمي څېړنو پايلې په پوره جرأت او مسلکي ډول وړاندې کړي.
ورپسې د دغه پوهنتون د علمي او محصلانو چارو مرستیال پوهندوی مولوي ميرويس ستانکزي په ساينسي او ځانګړي ډول کرنيزو علومو برخه کې د علمي څېړنو پر ارزښت هر اړخيزې خبرې وکړې او زياته يې کړه افغانستان يو کرنيز هيواد دی او تر بل هر وخت په دې برخه کې د علمي څېړنو فرصتونه او امکانات ډېر دي. ښاغلي ستانکزي همدا راز د کرنې پوهنځي د رهبري او استادانو هغه نوښت او لارښوونې هم وستايلې، چې اړوندو محصلانو ته يې په پوسټرونو کې د څېړنو د پايلو د غونډولو په موخه کړې وې.
تر دې وروسته يادو محصلانو په ډلييز او منظم ډول خپل پروپوزلونه د ۳ کسیز ژوري هئيت پوهنوال دکتور وحيدالله عبدالرحيم زی، پوهنيار سيد حفيظ الله حيات ، پوهنيار نعيم الله رحماني او نورور ګډونوالو په حضور کې وړاندې کړل.
د نشراتو، اړيکو او عامه پوهاوي عمومي مدیریت.
