لوګر پوهنتون او د لوګر ولايت د تخنیکي او مسلکي زده کړو آمريت يو شمېر استادانو ته د( پروپوزل ليکنې) تر سرليک لاندې روزنيز سمينار وړاندې شو!
دوشنبه: د ۱۴۰۴ کال سنبله/ وږي ۲۵ مه او د ۱۴۴۷ ربیع الاول ۲۳ مه نېټه.
لوګر پوهنتون د علمي څېړنو او علمي مجلې آمريت او د کرنې پوهنځي د څېړنو کمېټې په هڅو د دغه پوهنتون او د لوګر ولايت د تخنیکي او مسلکي زده کړو آمريت يو شمېر استادانو ته د( پروپوزل ليکنې) تر سرليک لاندې روزنيز سمينار وړاندې شو.
د سمينار پيل د قرآنکريم د څو مبارکو آيتونو تر تلاوت وروسته د علمي او محصلانو چارو مرستیال پوهندوی مولوي ميرويس ستانکزي په خبرو وشو. ښاغلي ستانکزي دا هر څه پر علمي څېړنو پورې نغښتی ياد کړل او همدا راز د ټولنې په کچه يې د علمي څېړنو ترسره کول او د علمي برنامو د تولید امتياز د پوهنتون او نورو لوړو زده استادانو پورې تړلی وباله. نوموړي همدا راز زياته کړه، چې تل يې هڅه ده؛ تر څو د دغه پوهنتون او همدا راز د لوګر ولايت د تخنیکي او مسلکي زده کړو آمريت استادانو لپاره د شوي هوکړه ليک له مخې دې ته ورته روزنيز علمي سمينارونو ترتيب او وړاندې کړي.
ورپسې د پروپوزل ليکنې په اړوند سمينار، چې د لوګر پوهنتون د کرنې پوهنځي کرنيز اقتصاد او پراختيا څانګې آمر پوهنيار احمد نور ستانکزي لخوا ترتیب شوی و، په منظم ډول وړاندې شو.
د يادولو ده، چې د سمينار په پای کې د کرنې پوهنځي د رهبري لخوا د دغه پوهنځي غوره اداري کارکوونکي او یو شمېر مخکښ محصلان هم وستايل شول.
د نشراتو، اړيکو او عامه پوهاوي عمومي مدیریت.
