له پوهنتون هر فارغ زده کړیال باید د جماعت لمونځ ورکولو وړتیا او جرأت ولري!
یکشنبه: د ۱۴۰۳ کال اسد/زمري ۱۴مه او د ۱۴۴۶ محرم الحرام ۲۹مه نېټه.
لوګر د لوړو زده کړو موسسې رییس مولوي ضیاءالاحمد صارم د دغې موسسې زده کړیالانو ته د ۱۴۰۳ کال پسرلني سمستر د پای ازموینو پر مهال وینا وویل، چې له پوهنتون هر فارغ زده کړیال باید په اسلامي ټولنه کې د جماعت لمونځ ورکولو وړیتا او جرأت ولري.
ښاغلي صارم د وینا پر مهال زده کړیالان د ټولنې ځوانه هستي او د هیواد د خدمت ستره هیله یاد کړل. د نوموړي په خبره تر بل هر چا په ټولنه کې لوستي ځوانانو ته د هیواد د آبادۍ او ښه خدمت کولو تمه کېدای شي. نوموړي همدا راز د پوهنتون او مدرسې تر منځ د واټن لرې کېدو ته په اشارې وویل، چې له مدرسې فارغ ځوان باید د عصري علومو او په ځانګړي ډول اوسنۍ ټکنالوجي کې پوره مهارت ولري او د دې تر څنګ له پوهنتون څخه د هرې څانګې فارغ ځوان باید په اسلامي، ملي او فکري پوهه سمبال وي. د نوموړي په خبره کله، چې هم یو ځوان له پوهنتون څخه فارغیږي، نو باید د اړتیا پر وخت د مدرسې ط،،،البعلم ته ورته د جماعت لمونځ ورکولو پوره وړتیا ولري او د اسلام مبارک دین او عقیدې په برخه کې باید د پوره معلوماتو او پوهې درلودونکی وي.
باید وویل شي، چې لوګر د لوړو زده کړو موسسې ټولو زده کړیالانو ته د اسلامي عقیدې او فکري روزنې په برخه کې د اسلامي ثقافت د مضمونونو سربېره له منظم مهالوېش سره سم د دغې موسسې د دعوت او ارشاد آمریت لخوا د تکړه دیني عالمانو پر مټ روزنیز درسونه او سمینارونه وړاندې کیږي.
